أنا رحاب موافي

من بعد لما استقلت من الوظيفه سنه ٢٠١٠ واتفرغت لاسرتي وتربيه اولادي وأنا جوايا صراع بين ان العيله هي الرساله والهدف اللي أنا عايشه عشانه وبين اني عايزه أحقق حاجه لنفسي.

والصراع ده كان بيزيد مع الوقت لأني ما كنتش قادره أحدد الهدف من حياتي ؟ و حاوصله امتى و ازاي؟

وبعد ست سنين واجهت أول محنه في حياتي وبالرغم من صعوبتها علي وعلى أولادي الا اِنها كانت سبب التغيير اللي أنا وصلتله الحمد لله.

بالتحديد في مايو ٢٠١٦ حصلتلي مشاكل صحية كتير خلتني أرجع افكر وأعيد حساباتي وأحاول أحدد هدفي الحقيقي في الحياه.

وفي بداية ٢٠١٧ حضرت كورس عن التغذية وبدأت أطبق حاجات بسيطة من اللي سمعتها واتعلمتها وبفضل ربنا لمست التغييرو التحسن في صحتي على طول.

آلام كانت عندي اختفت، نشاطي وتركيزي اتحسن ، نومي بقى أفضل حتى موودي ومزاجي اتحسنوا كتير.

وهنا أدركت فعلا إن

  Food changes everything

التغيير  حقيقي لمس كتير من جوانب حياتي وهنا قررت أدرس في أكبر معهد تغذيه وكوتشينج في امريكا

Institute for Integrative Nutrition

ودي كانت البدايه ، بدايه رحله تحديد الهدف ، رحله التعلم، رحله اكتشاف نفسي

وخلال الرحلة دي رجعت بالذاكرة لورا وافتكرت ان وقت حملي في أولادي كنت محتاجة فعلا المعلومة الصحيحة عن التغذية والبدايل الصحية للأكل اللي كان بيتعبني.

كمان كنت محتاجة أحس اني مش لوحدي وألاقي حد بيسمعني ويحس بي ويشجعني.

وكمان فكرت في أولادي وازاي ان التغيير اللي حصل في نظام أكلنا ما كانش سهل عليهم وفي حاجات ما عرفتش أغيرها في طريقة أكلهم وأدركت ان العادات الصحية كل لما تتزرع في أولادنا من بدري كل ما كان أفضل.

وهنا قررت إني أساعد السيدات في فتره من أهم الفترات وهي

قبل وأثناء وبعد الحمل.

عشان كده درست كمان برنامج متخصص للحوامل في

Dr. Sears Wellness Institute

وفي خلال الرحلة دي اتعلمت وعرفت حاجات كتير:

🍏 اتعلمت ان الصحه مش بس مفتاحها في الاكل والرياضه لأ دي ليها مفاتيح تانيه مهمه ومؤثره.

🍏 عرفت إن زي ما بنستثمر في أولادنا وبنكون عايزين ليهم أحسن مدارس وأحسن لبس وأحسن فسح محتاجين نستثمر في أهم حاجه وهي صحتهم والاستثمار ده بيبدأ وهو لسه جنين في الرحم.

🍏 عرفت وفهمت إني  محتاجه أستمتع بكل لحظه مع اولادي لان السنين بتجري بسرعه وان رحله الاستمتاع تبدأ من وهو لسه جنين جواكي.