التدخين والحمل
تخيلي نفسك شايلة ابنك أو بنتك
وجيتي تدخلي مكان
ولاقيتي على الباب تحذير
” المكان ده فيه 4000 غاز سام “
يا ترى حتدخلي؟
ولا مش حتفكري أصلا تفتحي الباب
للأسف ده بالضبط اللي بيحصل
لو إنتي كنتي بتدخني وقت الحمل
أو بتتعرضي للتدخين السلبي
بتعرضي نفسك وبتعرضي البيبي
لمخاطر كتيرة أثبتتها الدراسات منها
ممكن يسبب إجهاض.
بيأثر على وصول الدم للبيبي وبالتالي بيتولد وزنه صغير
بيأثر على نمو مخ البيبي وبالتالي بيضعف قدراته الذهنية لما يكبر
بيقلل من هرمون البرولاكتين المسؤول عن اللبن وقت الرضاعة
طيب لو إنتي بتتعرضي للتدخين السلبي
يبقى حاولي تبعدي أو تطلبي من اللي بيدخن إنه يوقف
طب ولو إنتي اللي بتشربي سجاير
إزاي ممكن تبدأي تساعدي نفسك ؟
قللي عدد السجاير اللي بتشربيها
لما تشربي السيجارة ما تخلصيهاش للآخر
حطيها في مكان بعيد عن إيدك
دوري على السبب اللي بيخليكي تدخني
واستبدليه بحاجه تانيه
يعني لو عايزه تمضغي حاجه
جربي تاكلي جزر أو تمضغي لبان
لو عايزه إيدك تكون مشغوله
إرسمي أو إكتبي
إربطي التدخين بصورة وحشة في خيالك
عشان لما تفكري تدخني تفتكري الصورة دي
خليكي وسط ناس تساعدك وتعينك
إطلبي مساعده من متخصصين
الموضوع صعب
لأنه نوع من الإدمان
لكن يستاهل المحاولة لأن التمن
بيدفعه طفل ما لوش أي ذنب
غير إنه جواكي