أنا رحاب محسن موافي

أم لولد وبنت..

استقلت من الوظيفه سنه ٢٠١٠ واتفرغت لاسرتي وتربيه أولادي.

ومن وقتها وأنا جوايا صراع بين ان العيله هي الرساله والهدف اللي أنا عايشه عشانه وبين اني عايزه أحقق حاجه لنفسي.

والصراع ده كان بيزيد مع الوقت لأني ما كنتش قادره أحدد الهدف من حياتي ؟ و حاوصله إمتى و إزاي؟

لكن في محطات ومشاهد في حياتي هي اللي ساعدتني أحدد هدفي وأحاول أسعى له

المشهد رقم 1: كورس لسارة سيف وطلبت مننا نكتب بنحلم بايه ونفسنا نكون ايه؟

لأول وهلة “طبعا مش عارفة أكتب ايه” لأني أصلا مش عارفة أنا عايزه ايه

عايزه أعمل تغيير في حياتي لكن مش عارفه ايه وازاي؟

بعدين لاقيتني باكتب “عايزه أكون خبيرة في التغذية الصحية” ازاي وليه ما أعرفش لغاية دلوقتي.

حقيقي ما كنتش وقتها  ولا بادرس ولا باقرأ أي حاجه ليها علاقة بالصحة أو التغذية

المشهد رقم 2: امتحان من ربنا في صحتي

على قد ما كان صعب على قد ما كان المنحة على شكل محنة.

لأني بعدها أخدت كورس في التغذيه لمدة 3 أيام لهبة أنور Health coach عشان أزود مناعتي وأهتم بأكل اولادي

ولقيتني بادخل عالم جديد و رجعت أقرأ وادور على معلومات واتشديت للمجال ده جدااا.

وابتدا كل اللي حواليا يشوف ويلاحظ التغيير والشغف.

ومع تشجيعهم دخلت وبدأت الدراسة في أكبر معهد من معاهد التغذيه والكوتشينج في أمريكا في مايو ٢٠١٧

Institute of Integrative Nutrition, NY

المشهد رقم 3: مطلوب مننا نكتب النية والهدف من الدراسة

كتبت اني عايزه أساعد السيدات في فترة الحمل والرضاعة

كان نفسي كل واحدة تشوف ازاي التغذية بتفرق في النشاط والتركيز والموود ويعيشوا ده في أهم فترة في حياتهم

يمكن أنا ما جربتش التغذية السليمة وقت حملي ولا كان موضوع التغذية الصحية ده في بالي أصلا ولا كنت أعرف قد ايه هو مهم لصحتي و صحة أولادي عشان كده نفسي أنقل العلم ده لكل واحدة حامل أو بتفكر في الحمل.

وقررت بعدها إني أدرس دراسة متخصصة عن التغذية في فترة الحمل وأكون

Pregnancy Health Coach

والحمد لله درست في  Dr.Sears Wellness Institute

وبعدها قدرت أساعد عشرات الحوامل إنهم يهتموا بتغذيتهم وصحتهم وقدمت لهم الدعم النفسي في فترة من أهم فترات حياتهم.

باحلم أغير معتقدات كتير عندنا عن الحامل زي:

انها لازم تضاعف كمية الأكل من غير ما تشوف جودته

إن ليها عُذرها انها ما تلعبش رياضة وما تعملش أي مجهود خالص و كأنها شخص مريض

نفسي أطمنها إن في سيدات زيها وحاسيين بيها.

باحلم أدخل ثقافة الاهتمام بالتغذية قبل الحمل كمان

لأن البدايات بتفرق كتير

وكل ما الأساس كان متين, كان البنيان قوي

باحلم أوصل لكل واحدة بعد الولادة و أطمنها وأقولها

أيوه حتتعبي

أيوه حتسهري وحاتنسي طعم النوم أيام كتير

وحاتنسي ساعات تاكلي وتشربي

وخططك وأحلامك ممكن تتأجل شوية

بس دايما افتكري إن ده الحلم اللي اتمنتيه ودعيتي ربنا عشانه

إنتي بتبني إنسان

بتسيبي أثر

إزرعي ذكريات حلوة معاهم وبيهم

إستمتعي بكل التفاصيل عشان حتتغير أسرع مما تتخيلي

باحلم معاكوا وبيكوا يتكون مجتمع من الأمهات

يعيشوا الفترة دي بكل تفاصيلها

يستمتعوا برغم التعب والمجهود

يحسوا بالمعجزة اللي بتتكون جواهم

ويتعلموا و يجهزوا نفسهم قبل وصول الأمانة